《東張西望》正義女神︳利穎怡背負家人反對追逐演員夢 驚住採訪：我哋嘅幫忙微不足道

無綫資訊節目《東張西望》不時為小市民發聲，有成功個案為苦主爭取公義，亦有遇上失敗時候，但不論結果如何，節目已獲得觀眾肯定，當中主持利穎怡同黃穎君及林希靈等，因此先後被外界封為「正義女神」。利穎怡感謝大眾給予這個美譽，開心之餘亦帶來一種無形壓力，就是存有一種使命感，驅使她要努力做好本份，「我覺得只要幫到人就已經好好，每個人都有自己故事。我哋嘅幫忙只係微不足道。」

{{hket:ul-video id="5424"}}{{/hket:ul-video}}

現年34歲的利穎怡（Joan）在加拿大時是修讀經濟學系學士課程，回港後到香港中文大學進修表演藝術系課程，加入《東張西望》這個大家庭已經有7年時間。利穎怡坦言家人並不支持入行，認為當日返港後要學以致用，去搵一份相關的工作，「外國讀書大學畢業諗住回流返香港，有兩樣嘢係我好想做，就係PR（公關）同演員。覺得應該趁後生加入演員行業，入行由臨時演員做起，之後輾轉間就做咗《東張》主持，其實一路以嚟屋企人係唔支持我嘅，覺得我喺大學讀Business，點解唔做番一樣嘅嘢呢？佢哋覺得咁樣至少係穩定生活，就算做咗《東張》有咗穩定收入，佢哋都係覺得我做得幾耐？幾時先會轉行？到而家阿媽每次打電話嚟都仲會問我做幾耐，都係一直問住呢樣嘢。」

{{hket:inline-image name="03091009.jpg"}}{{/hket:inline-image}}

{{hket:inline-image name="274713017_503956254423488_6504590299381184154_n.jpg"}}{{/hket:inline-image}}

東張西望丨利穎怡率義工清理735公斤鋁罐 滿頭汗不顧形象 網友大讚敬業【下一頁】

眾所周知臨時演員收入不穩定，初期如何維持生活？利穎怡表示：「其實我從來無問過屋企人攞錢，當然我都唔係畀太多家用畀佢哋，係後來《東張》收入開始穩定，我先每個月畀足夠家用屋企人。嗰陣做臨時演員時，有另外做Marketing工作，收入尚算穩定，後來考到入藝員訓練班，訓練班係返朝九晚六，當時律師樓工作，公司畀我唔使辭職，每日返完學之後夜晚再返嚟開工，嗰陣係佢幫我渡過最難嘅時候，到入咗《東張》因為實在太忙，要全職去從事藝員呢個職業。」 

利穎怡加入《東張》早期是做外景主持，近年多了機會坐錄影廠做主播，可謂越做越好，「一開始時係做外景（採訪），嗰陣做外景主持時就覺得主播係有個認可，呢兩年終於做到，係會超緊張同超開心，不過我覺得外景係有種成就感，因為親身落到去認識好多唔同嘅人，學到唔同嘅嘢，再加上親身去幫到人。（有否好難忘的採訪？）有次去油麻地擊破假太湖大閘蟹，對方就話自己係買真正嘅太湖大閘蟹，安排咗寫稿嘅女同事去『放蛇』，中途我就埋去突擊採訪，嗰個男人就好惡反問我咩事？我雖然怯一怯又唔可以表現出嚟，惟有死頂去追問，當時追咗兩條街後想放棄，點知佢放低大閘蟹後就返轉頭，好似打電話『Call馬』嚟，正正企喺我哋採訪車隔籬，我哋當時驚到越坐越低。因為通常有部Cam喺度，佢哋唔會郁手郁腳，但係如果佢哋返轉頭就知可能有事發生。」

{{hket:inline-image name="joan12_600.jpg"}}{{/hket:inline-image}}

{{hket:inline-image name="270202556_471157551036692_1455428135339959811_n.jpg"}}{{/hket:inline-image}}

東張西望│曱甴屋婆婆搬竇2個月即被迫遷 街坊叫苦連天：曱甴多到好恐怖【下一頁】

至於老公同家人有否擔心她面對工作上安危？「講真我屋企人無問，但佢哋最驚我拍蝨患個案，因為蝨係你可以帶到返屋企。（之前曾採訪鋁罐山同曱甴屋？）都驚㗎，特別係仲有疫情，當你見到義工好用心去清潔，自己亦好投入專注件事就唔會理會得太多，你成個專注力放喺鋁罐度，去幫手清潔晒現場，就唔會諗太多其他嘢。（被外界封《東張》正義女神？）好多謝大家稱我做正義女神，雖然係開心，但有一種壓力，我會更加有一種使命感去做好自己，甚至去幫到更多嘅人。無論要去追擊，或要去老鼠曱甴嘅地方，我覺得只要幫到人就已經好好，每個人都有自己故事，希望唔同嘅人大家關懷多啲彼此。」

《東張》曾經成功為苦主發聲，但有些個案未能圓滿解決，利穎怡無奈表示：「做過好多騙案，老實講好多時播咗出嚟，都未必真係幫到佢哋，無奈有時係制度上，或者騙徒已經逃之夭夭，只係純粹畀更多嘅人知道，唔好畀類似個案呃到，所以會不停有呢種無力感，幫唔到佢哋。不過最無力係天瑜（醫療事故的6歲小女童），真係好慘，見住佢爸爸接受訪問，幻想到係自己可能會崩潰咗，就算我哋去報道出嚟，天瑜妹妹都未必一定會好番，唔會因為我哋報道就會好番…我哋嘅幫忙微不足道。」

（↓點擊圖片放大↓）

利穎怡做《東張》主持這幾年時間，其實從未忘記做演員的初心，有份參與劇集《荷里活有個大老千》、《一笑渡凡間》及《星空下的仁醫》等，亦不定期在《愛回家》中出現；2018年還參演網絡大電影《奪命追兇》，又製作兼主演一些微電影。她說：「雖然而家係去咗做主持，覺得條條大路通羅馬，之前拍過好多微電影，有啲係自己製作，自己可以寫自己戲份，又要負責搵人搵地方拍攝同負責剪片，但每次做完覺得好辛苦，無奈哋好難搵到一個幕後一齊去做。所以放棄了製作有2、3年，我係想今年再從新開始，視乎疫情點先決定。（堅持演員夢？）有好多師兄師姐已離開呢行，甚至乎我啲同學都轉行，好多人知我唔係有錢人，要靠自己拼搏又唔識人，仲要屋企人唔支持，點解我可以繼續呢？我都會問自己，以前每個月總會有幾日好唔開心，點解我要繼續做呢？但我係好容易被人觸動到，令到我記番起心裏面嘅一團火，覺得每個人可以搵到自己夢想去做係好難得嘅事，既然搵到，人生咁短暫，點解你唔努力去追尋你自己嘅夢？咁我一直記住呢樣嘢，繼續向前行。」她希望今年多些演戲機會外，透露正計劃從事藝術方面的小生意，落實後會再公布。

撰文：梁榮達
攝影：王華婷、馮凱宜
場地：AF WORKSHOP by Angel Fund Group（https://afworkshop.business.site）
服裝：Prada 
髮型：Perry Law @WP Salon

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】